Rajkot: રાજકોટમાં 6 વર્ષની બાળકી સાથે દુષ્કર્મનો પ્રયાસ, પોલીસની સતર્કતાથી બચી માસૂમ

Rajkot: રાજકોટના મેટોડા GIDC વિસ્તારમાં 6 વર્ષની બાળકીનું અપહરણ કરી તેની સાથે દુષ્કર્મ કરવાનો પ્રયાસ કરવામાં આવ્યો હોવાની ચોંકાવનારી ઘટના સામે આવી છે. બાળકી ઘર પાસે રમી રહી હતી ત્યારે એક શખસ તેને આઈસક્રીમ અપાવવાની લાલચ આપી પોતાની સાથે લઈ ગયો હતો. પરિવારને બાળકી નજરે ન પડતાં તરત જ પોલીસને જાણ કરવામાં આવી હતી.

ઘટનાની જાણ થતાં જ પોલીસ એક્શનમાં આવી ગઈ હતી અને બાળકીની શોધખોળ શરૂ કરી હતી. પોલીસ CCTV કેમેરાના આધારે બાળકી અને આરોપીની દિશા સુધી પહોંચી હતી. ત્યારબાદ ખીરસરા તરફના રસ્તા પર તપાસ દરમિયાન ઝાડીમાંથી બાળકીના રડવાનો અવાજ સંભળાયો હતો. પોલીસે નીચે ઉતરીને તપાસ કરતાં બાળકી અને આરોપી બંને મળી આવ્યા હતા.

આઈસક્રીમની લાલચ આપી બાળકીનું અપહરણ

મેટોડા GIDC વિસ્તારમાં પરિવાર સાથે રહેતી 6 વર્ષની બાળકી ઘર નજીક રમી રહી હતી. આ દરમિયાન વિક્રમ સુખદેવ ગૌર નામનો 36 વર્ષીય શખસ તેની પાસે આવ્યો હતો અને તેને આઈસક્રીમ અપાવવાની લાલચ આપી પોતાની સાથે લઈ ગયો હતો.

થોડીવાર બાદ બાળકી ઘરે ન દેખાતા પરિવારના સભ્યો ચિંતામાં મુકાઈ ગયા હતા. તેમણે સમય બગાડ્યા વિના 112 ઈમરજન્સી સેવાને જાણ કરી હતી. મામલો ગંભીર હોવાથી 112ની ટીમે તરત જ GIDC પોલીસને જાણ કરી હતી.

પોલીસે ઘટનાની ગંભીરતા સમજીને તાત્કાલિક શોધખોળ શરૂ કરી હતી. આસપાસના CCTV કેમેરા તપાસવામાં આવ્યા હતા. CCTVના આધારે આરોપી બાળકી સાથે ખીરસરા તરફના રસ્તે ગયો હોવાનું પોલીસને જાણવા મળ્યું હતું.

ઝાડીમાંથી બાળકીનો રડવાનો અવાજ આવ્યો

બાળકીના અપહરણ બાદ પરિવારની ચિંતા સતત વધી રહી હતી. પોલીસની ટીમ ખીરસરા તરફના રસ્તા પર અલગ-અલગ જગ્યાએ તપાસ કરી રહી હતી. આ દરમિયાન રસ્તા નીચે આવેલી ઝાડીમાંથી બાળકીના રડવાનો અવાજ પોલીસને સંભળાયો હતો.

પોલીસકર્મીઓ તરત જ અવાજની દિશામાં ગયા હતા. ઝાડીમાં તપાસ કરતાં બાળકી સાથે આરોપી પણ મળી આવ્યો હતો. પોલીસે બંનેને બહાર કાઢી બાળકીનો કબજો પરિવારને સોંપવા માટેની કાર્યવાહી શરૂ કરી હતી.

પોલીસના જણાવ્યા મુજબ, જ્યારે ટીમ ત્યાં પહોંચી ત્યારે બાળકીના શરીર પર કપડાં નહોતા, જ્યારે આરોપી અર્ધનગ્ન હાલતમાં હતો. પ્રાથમિક તપાસમાં બાળકી સાથે દુષ્કર્મ થયું ન હોવાનું સામે આવ્યું છે. જોકે ઘટનાની ગંભીરતાને ધ્યાનમાં રાખીને બાળકી અને આરોપી બંનેનું મેડિકલ કરાવવાની કાર્યવાહી કરવામાં આવી છે.

આરોપીના મોબાઈલમાંથી પોર્ન સાઈટની હિસ્ટ્રી મળી

તપાસ દરમિયાન પોલીસે આરોપી વિક્રમ ગૌરનો મોબાઈલ ફોન પણ તપાસ્યો હતો. પોલીસને તેના ફોનમાં પોર્ન સાઈટ સર્ચ કરવામાં આવી હોવાની હિસ્ટ્રી મળી હોવાની માહિતી સામે આવી છે.

પોલીસની પૂછપરછમાં એ પણ સામે આવ્યું છે કે આરોપીને ત્રણ વર્ષની દીકરી છે. વિક્રમ ગૌર અગાઉ રાજકોટ ગ્રામ્ય વિસ્તારમાં આવેલા શાપર-વેરાવળના ઇન્ડસ્ટ્રીયલ વિસ્તારમાં લગભગ ત્રણ વર્ષ સુધી મજૂરી કામ કરી ચૂક્યો હોવાનું જાણવા મળ્યું છે.

ત્યારબાદ તે પોતાના વતન ગયો હતો. આશરે બે મહિના પહેલા તે ફરી રાજકોટ ગ્રામ્ય વિસ્તારમાં આવ્યો હતો અને મેટોડામાં રહેવા લાગ્યો હતો. હાલમાં કોઈ ચોક્કસ કામ કરતો ન હોવાનું અને કામની શોધમાં હોવાનું તેણે પોલીસની પ્રાથમિક પૂછપરછમાં જણાવ્યું હોવાનું જાણવા મળ્યું છે.

આ પણ વાંચો: Bhavnagar Lattha Kand: વધુ એક વ્યક્તિનું મોત, મૃત્યુઆંક 12 પર પહોંચ્યો

પોલીસની ઝડપી કાર્યવાહીથી બાળકી મળી આવી

આ સમગ્ર ઘટનામાં પોલીસની ઝડપી કામગીરી મહત્વની સાબિત થઈ હતી. પરિવાર તરફથી સમયસર જાણ કરવામાં આવતા પોલીસ અને 112ની ટીમે તરત જ શોધખોળ શરૂ કરી હતી.

ઘટનાક્રમ મુજબ, સાંજે આશરે 7 વાગ્યે બાળકી મેટોડા GIDC વિસ્તારમાંથી ગુમ થઈ હતી. લગભગ 8 વાગ્યે પરિવાર દ્વારા 112ને જાણ કરવામાં આવી હતી. ત્યારબાદ 112ની ટીમે GIDC પોલીસને જાણ કરી હતી. પોલીસે CCTV અને સ્થળ પરની તપાસના આધારે ખીરસરા રોડ તરફ શોધખોળ શરૂ કરી હતી.

થોડા જ સમયમાં પોલીસને બાળકીના રડવાનો અવાજ સંભળાયો અને ઝાડીમાંથી તેને આરોપી સાથે શોધી કાઢવામાં આવી હતી.

આરોપીની ધરપકડ, વધુ તપાસ શરૂ

આ કેસમાં મેટોડા પોલીસે આરોપી વિક્રમ સુખદેવ ગૌરની ધરપકડ કરી છે. બાળકીનું અપહરણ, POCSO Act અને દુષ્કર્મના પ્રયાસ સહિતની સંબંધિત કલમો હેઠળ ગુનો નોંધવામાં આવ્યો છે.

હાલ પોલીસે આરોપીના મોબાઈલ ફોન, CCTV ફૂટેજ, મેડિકલ રિપોર્ટ અને અન્ય પુરાવાના આધારે વધુ તપાસ હાથ ધરી છે. ઘટનાની સમગ્ર હકીકત તપાસ પૂર્ણ થયા બાદ વધુ સ્પષ્ટ થશે.

આ ઘટનામાં સૌથી મહત્વની વાત એ રહી કે બાળકી ગુમ થયા બાદ પરિવારે પોલીસને જાણ કરવામાં કોઈ વિલંબ કર્યો નહોતો. તેના કારણે પોલીસની ટીમે પણ તાત્કાલિક શોધખોળ શરૂ કરી અને થોડા જ સમયમાં માસૂમ બાળકીને શોધી કાઢી હતી. ઘટનાને લઈને મેટોડા અને આસપાસના વિસ્તારમાં પણ ચકચાર મચી છે.

આ પણ વાંચો: Bhavnagar Lattha Kand: વધુ એક વ્યક્તિનું મોત, મૃત્યુઆંક 12 પર પહોંચ્યો