Sargvala Khedut Andolan: GSPL ગેસ પાઇપલાઇનના મુદ્દે સરગવાળામાં ખેડૂતો અને પોલીસ વચ્ચે ઘર્ષણ, વિરોધ ઉગ્ર બન્યો

Sargvala Khedut Andolan: અમદાવાદ જિલ્લાના ધોળા તાલુકાના સરગવાળા ગામમાં GSPLગેસ પાઇપલાઇન નાખવાના મુદ્દે 21/11/2026 તારીખે ખેડૂતો અને પોલીસ વચ્ચે ઘર્ષણ સર્જાયું હતું. છેલ્લા કેટલાક દિવસોથી ગામના ખેડૂતો પાઇપલાઇન નાખવાના કામનો વિરોધ કરી રહ્યા હતા, પરંતુ મામલો ઉકેલવાને બદલે ઘટનાના દિવસે સ્થિતિ વધુ તંગ બની હતી.
મળતી માહિતી મુજબ, સરગવાળા ગામના ખેડૂતોનો આક્ષેપ છે કે કંપની દ્વારા તેમની ખાનગી ખેતીની જમીનોમાંથી ગેસ પાઇપલાઇન પસાર કરવામાં આવી રહી છે, પરંતુ આ માટે ખેડૂતોની યોગ્ય મંજૂરી લેવામાં આવી નથી. એટલું જ નહીં, જમીનના ઉપયોગ બદલ ખેડૂતોને વળતર પણ ચૂકવવામાં આવ્યું નથી, એવો ગ્રામજનોનો દાવો છે.
ખેડૂતો દ્વારા આ મુદ્દે અગાઉ તંત્ર સમક્ષ રજૂઆતો કરવામાં આવી હોવા છતાં કોઈ સંતોષકારક ઉકેલ આવ્યો ન હોવાનું સ્થાનિક લોકો જણાવી રહ્યા છે. ખેડૂતોની માંગણીઓનો નિકાલ ન થતાં તેમનો વિરોધ સતત વધી રહ્યો હતો.
આ દરમિયાન કંપનીના કર્મચારીઓ જેસીબી મશીનની મદદથી ખેડૂતોના ખેતરોમાં પાઇપલાઇન નાખવાની કામગીરી કરી રહ્યા હતા. કામ આગળ વધતું જોઈ ગ્રામજનો સ્થળ પર પહોંચ્યા અને વિરોધ શરૂ કર્યો હતો. પરિસ્થિતિને ધ્યાનમાં રાખીને કંપની દ્વારા પોલીસ બંદોબસ્ત પણ ગોઠવવામાં આવ્યો હતો.
આ પણ વાંચો: https://gujaratinews.co.in/kutch-accident-bhuj-khavda-highway-accident/
ખેડૂતો અને ગ્રામજનો પાઇપલાઇનની કામગીરી અટકાવવાની માંગ સાથે વિરોધ કરી રહ્યા હતા, ત્યારે પોલીસ સાથે ઘર્ષણ થયું હતું. આ ઘટનામાં બ્રિજરાજ સોલંકી સહિત કેટલાક સ્થાનિક લોકોની પોલીસ દ્વારા અટકાયત કરવામાં આવી હતી. અટકાયત બાદ ગ્રામજનોમાં રોષ વધુ ભભૂકી ઊઠ્યો હતો અને વિરોધ ઉગ્ર બન્યો હતો.
ત્યારબાદ ઘટનાસ્થળે પથ્થરમારો થયાના અહેવાલો સામે આવ્યા હતા. પોલીસ કર્મચારીઓ તેમજ કંપની અને પોલીસની ગાડીઓને નિશાન બનાવવામાં આવી હોવાની માહિતી મળી રહી છે.
સરગવાળા ગામમાં ગેસ પાઇપલાઇનનો મુદ્દો હવે વધુ ગંભીર બનતો જોવા મળી રહ્યો છે. ખેડૂતો પોતાની જમીન, મંજૂરી અને યોગ્ય વળતરની માંગને લઈને વિરોધ કરી રહ્યા છે. બીજી તરફ, ઘટનાને પગલે ગામમાં તણાવપૂર્ણ માહોલ સર્જાયો છે. હવે આ વિવાદમાં તંત્ર શું નિર્ણય લે છે અને ખેડૂતોની રજૂઆતોનો કેવો ઉકેલ આવે છે તેના પર સૌની નજર રહેશે.